Nongstoiñ, Nailur 18: Ka jingïakop khwai dohkha ha pung Pamphyrnai West Khasi Hills, ka la wanrah pynban ïa ka khubor ba sngewsih, ha kaba tang na ka daw ka jingsahkut jong ka kali bad ka jingbym poi sha ka jaka sumar ha ka por ba biang, kawei ka longkmie ka la kha khun hapoh ka kali bad tang hadien katto katne por i khunlung i la khlad noh na kane ka sla pyrthei.
Kane ka la jia ha ka sngi Saitjaiñ jong ka taiew baladep ha kaba ki rawon na kylleng ki jaka ki la tuid sha ka jaka ïakop khwai ha Pamphyrnai. Ka thymmei khubor ba la ioh lum ka la iathuh, hadien ba la pynbna ïa ka tiket khalai nusib bad ioh kali ha ka por 2:00 baje nohphai sgi, ka shilynter jong ka surokbah National Highway kaba don harud jong ka pung ha Pamphyrnai, ka la shlei da ki paidbah bad ki rawon kiba la mih sha surok bad kane ka la wanrah ïa ka jingdheng kali kaba la neh da ki bun bun kynta haduh da kem iong rein.
Ka jingsahkut ki kali kiba ïaid lyngba kane ka surok ka la pyngbitar ruh ia ki nongleit nongwan kiba la sahkut da ki bun kynta hapdeng surok. La iathuh ruh ba ka jingdheng kali ka dei ruh namar ka jingshlei da ki kali ha baroh arliang ka surok. Kumta ki kali kiba mih bad leit sha Nongstoiñ ki la sahkut lut. Kine ki kali kim dei tang jong ki riew shimet bad ki kali kamai, hynrei wat ki kali Pulit, ki kali jong ki ophisar sorkar bad khamtam ki kali kit nongpang ruh ki la ngat ha kane ka dheng kali.
Kaba kham sngewsih eh ka long ïa ka jingjia ïa kawei ka longkmie ba armet, lem bad ki bahaïing kiba don ha kawei ka kali Tourist rong lieh kaba thmu ban leit sha jaka sumar. Hynrei naduh Nongspung kane ka kali ka la shu ieng sah hajuh bad ar ngut ki rangbah kiba don hapoh kali ki la mih ban ïakren bad ki rawon ban pyllait lem hynrei ki la shah kren heh pynban.
Da ka jingbym banse ki la hap ban ïaid kjat naduh Nongspung bad leit ïakren ïa ki Pulit kiba don ha Pamphyrnai ban ïarap pyllait ïa ka kali ban poi sha jaka sumar. La iatuh ba ynda la poi ha ka shnong Khyllem Tiehsaw, ka longkmie ka la kha ïa i khun i khun shynrang bad tang hadien katto katne por i khunlung i la khlad noh. Kane ka longkmie mynta ka don hapdeng ka jingshitom bad ka dang shah sumar ha Holy Cross Hospital, Mairang.
Kane kam dei shuh ka sien banyngkong ba ki kali kin ngat ha ka jingdheng kali ha Pamphyrnai hynrei manla ka por haba don ka jingpynïakop khwai ka ju jia kumne.
Ha ka sngi saitjaiñ ka jingbun briew bad ki kali ka la long ar shah bad lai shah ïa kaei kaba ju long baroh shikatta. Dei na kata ka daw ka jingsahkut ka leit ka wan ka la long kaba jur bha bad ka la neh ruh da ki bun bun kynta haduh da dum syndon ka suiñ bneng.
