Shillong, Nailur 18: Ka Khasi Students Union (KSU) ka la takrain tyngeh ia ka Sorkar Meghalaya Democratic Alliance (MDA) ba ialam da ka National Peoples Party kaba la bthah ia u Deputy Commissioner jong ka East Jaintia Hills District u Abhilash Baranwal ban khot iakren ia ki nongialam jong ka KSU halor ka jingkhang khyrdep ia ka khyrdop khrong khajna ne ka Toll Gate jong ka National Highway Authority of India kaba don ha ka shnong Lumshnong, East Jaintia Hills District.
Kum ban shu pynkynmaw hangne, ka KSU ka la khang tala ia kane ka khyrdop khrong khajna jong ka National Highway Authority of India naduh ka 8 tarik, Nailar, 2023 hadien National Highway Authority of India kam shym la maramot satia ia ka surokbah National Highway-6 kaba la jot rathai bad pynsuhsat ia ki paidbah ha ka leit ka wan.
Ha ka jingiakren bad ki lad pathai khubor, ha ka Lah Sngi u Blei u General Secretary jong ka KSU u samla Kwilniss S. Suchiang u la kynthoh da kaba ong, ‘kumno u DC u khot iakren halor ka Toll Gate, katba ha kaba iadei bad ka jingsniew jong ka surok, um kren eiei.”
Ka Seng ka la khot bad wer ruh ia kiwei ki paralok sengbhalang bad ia ki paidbah nongshong shnong jong ka East Jaintia Hills District ba kin ai jingkyrshan ia kane ka jingiakhih jong ka seng khnang ba kan wanrah ia ka jingmyntoi jong ki babun balang.
Ka Surok National Highway-6 ka dei ruh kaba pyniasoh ia ki katto katne ki jylla ha ka thain shatei lammihngi jong ka ri India.
U General Secretay ka KSU East Jaintia Hills District Unit u la iathuh ba ka seng la rai ban pyniaid beit shakhmat ia ka jingiakhih da kaba thiah ha surok ha ka 25 tarik, Nailur, 2023 kum ka dak ka jingbitar ia ka sorkar jylla bad ia ka National Highway Authority of India (NHAI) ki bym shym la shimkhia ia ka jingdawa ban shna pynbha ia ka surokbah National Highway-6 ha East Jaintia Hills District kaba la jot rathai haduh katta katta.
Shwa kane, kata, ki nongialam jong ka KSU ki la aiti da ka jingthoh ha u Symbud Myntri Rangbah ka Jylla u Bah Prestone Tynsong uba bat ruh ia ka tnat PWD (Roads) jong ka Sorkar Jylla ban phah maramot noh mardor ia kane ka surok kaba la long ka jinglehrain ym tang ia ka district hynrei wat ia ka jylla baroh kawei.
U samla Kwilniss Suchiang u la iathuh ba u Bah Prestone u la iathuh ba ka National Highway Authority of India (NHAI) ka la kular ban sa shna pynbha ia ka surok National Highway-6 ha kaba kut jong u bnai Nailur ne ha kaba sdang jong ka taiew ba nyngkong eh ka taiew baar jong u bnai Risaw mynta u snem 2023.
