Shillong, Naitung, 18: U MLA jong ka Mawryngkneng Constituency Bah Heavingstone Kharpran ha ka 11 tarik mynta u bnai u la leit ban iakynduh ia u Director jong ka NEIGRIHMS, Shillong u Dr. Nalin Mehta ban iakren halor katto katne ki mat kiba iadei bad ki samla pule.
Ha kane ka jingiakynduh, u Bah Heavingstone u la pan ka jingynshai na u Director ka NEIGRIHMS halor ka rukom thungkam thungjam ha kane ka jaka sumar jong ka Sorkar Pdeng.
Na ka liang jong u Director u la pynpaw ba ka jingthungkam hi ka long beit thik katkum ki kyndon ba la buh ka Sorkar India ryngkat ka Reservation ruh ka long Pan India.
U Director u la pynpaw ruh ba mynta kan ym don shuh ka Personal Interview hynrei ka jingthungkam kan long beit thik halor ka Entrance Exam ba ki khynnah ki thoh bad ia ki Advertisement ruh yn pynmih na ka por sha ka por.
U MLA u la pynsngew ia ka jingangnud ba ka NEIGRIHMS Hospital, kan pynlong ia ka Free Health Camp ha kylleng ka Mawryngkneng Constituency ia kaba u Director u la ai ka jingmynjur.
U la pynpaw ruh ba ha ka thungkam thungjam u kham kwah hi ia ki khynnah kiba sah ha ki shnong ba marjan jong kane ka jaka sumar ia kaba u Director ruh u la pynpaw kajuh ka jingsngew.
U Bah Kharpran u la kyntu ia ki khynnah samla jong ka Constituency kiba kwah rung kam ha kane ka jaka sumar ba kin durut bad ban khreh kot bha ban pynkhreh ia ki eksamin kiba ka NEIGRIHMS Hosital, ka pynlong bad ba kin buddien ia ki Advertisement laitkam ha kane ka jaka sumar.
