Shillong, K’lyngkot, 16: Ka Hynñiewtrep Achik National Movement (HANM) kum shi bynta ka buddien ia ki mat jingdawa kaba ki la pynlong ia ka jingiakhih ha nongbah New Delhi dang shen, ki nongialam ka seng ha ka sngi Baar ki la pan jingbit na ki bor ka Sorkar Jylla ban iakynduh ia ka President jong ka ri India ka Droupadi Murmu na ka bynta ban pynkynmaw ia ki lai tylli ki mat jingdawa kiba kum ka seng ka ladep ban aiti ia ka dorkhas ha ka ophis treikam ha New Delhi.
Shwa kane, ki nongiaalm jong ka HANM ki la ioh pdiang ia ki Phone call na u Secretary jong ka President bad kumjuh ruh na u Private Secretary jong ka President ban pyntikna ba katno ngut ki ban leit iakynduh ia ka President jong ka ri India.
Ha ka jingiakren bad ka Batesi Tv, u Bah Lamphrang Kharbani u la iathuh ba ka seng kan ia kynduh ia ka President jong ka Ri India halor ki lai tylli ki mat jingdawa ba ki paidbah jong ka jylla ki la angnud kata halor ka jingdawa ban pyntreikam ia ka Inner Line Permit (ILP), ka jingiapynbeit pud bad ban pynrung noh ia ka ktien Khasi bad Garo ha ka Khyrnit Baphra jong ka riti synshar ka ri India.
