Jowai, Nailur 18: Uwei u rangbah uba la tip kyrteng kum u Bah Khrawkupar Phawa 30 snem ka rta na ka Shnong Sohmynting u la khlad hashen hadien ba ka trok kaba u niah kaba don ia u nombar AS 01FC 8513 ka la thung baji hajan ka jingkieng Moo ha Iawmusiang, Jowai. Kane ka la jia ha ka miet sngi U Blei.
Ka jaka ba kane ka trok la thung baji, ka dei ka jaka ba ka surok ka long khongdong bha bad ka don hajan ka Challam-Syngkon Petrol Pump kaba dei ka bynta jong ka surok Shillong-Jowai.
Shwa ba ka trok kan thung baji, ka la leit tynrah ruh ia kawei dukan shna tyre hynrei donbok ba kam don satia kano kano ka jingjia basngewsih namarba hapoh kane ka dukan ym shym la don satia mano mano ruh ha kane ka khyllipmat.
Ki Pulit ka West Jaintia Hills kiba la ioh jingtip halor kane ka jingjia, ki la leit iarap ban sei ia ka met jong u Bah Khrawkupar napoh ka trok ha ka por kumba 2.30 baje nohphai sngi.
