Shillong, Nailur, 18: Ka Khasi Students Union, East Jaintia Hills District Unit ka la aiti da ka jingthoh sha u Symbud Myntri Rangbah ka Jylla u Bah Prestone Tynsong uba bat ruh ia ka tnat Kam Pohing ka Sorkar Jylla ban dawa ba dei ban weng noh mardor ia ki shipai BSF kiba buh ia ka khyrdop talasi kali ha Sonapyrdi.
Ha ka jingiakren bad ki lad pathai khubor ha ka Lah Sngi u Blei, u General Secretary ka KSU u samla Kwilniss S. Suchiang u la iathuh ba u Bah Prestone u la kular ban shimkhia ia kane ka jingdawa bad ong ruh ba un sa bthah ia u Superintendent of Police ka East Jaintia Hills District ba un sa phah da ka jingthoh sha ka tnat shipai BSF ban weng noh mardor ia kane ka khyrdop talasi kaba long u mawjynthud ia ka leit ka wan jong ki paidbah lyngba ka surokbah National Highway-6.
Ka seng ka la pynpaw ruh ba ka jingdon ka khyrdop talasi beain jong ki shipai BSF ka la pyndik haduh katta katta ia ki nongleit nongwan ha surokbah National Highway-6.
“Ha ka 2 tarik, Lber, 2023 shi kynhun ki shipai BSF kiba don ha ka kamram ki la shoh ia uwei u khynnah skul na ka shnong Huroi katba u dang leit sha iing. Kane ka jingjia, ka la pynher mynsiem ia ki paidbah bad im hapdeng ka jingsyier mynsiem,” ong ka seng ha ka dorkhas ba la aiti sha u Symbud Myntri Rangbah.
Ha kajuh ka por, ka seng ka la dawa ruh ia ka sorkar buh shuh shuh sa kawei ka Anti Infiltration Check Gate ha ka shnong Tongseng khnang ban tehlakam ia ka jingwanrung tuh jong ki mynder ri na ka ri Bangladesh sha u pud u sam jong ka ri India lyngba ka khapppud jong ka East Jaintia Hills District.
“Dang shen kawei ka longkmie Khasi-Pnar ka la shah pyniap dusmon ha ki runar ba prong tuh na ka ri Bangladesh ha ka shnong Donaskur,” la ong ka Seng.
Ka seng ka la dawa ruh ia ka Sorkar ban buh noh mardor ia ka Traffic Branch ha East Jaintia Hills District ka ban peit bad ban pyniaid ia ki kali ha kane ka distrik.
Ka seng ka la ong ba ka jingbym don ka Traffic Branch, ka la wanrah ia ka jingdheng kali, kaba jur bad buh jingma ruh ia ka leit ka wan jong ki paidbah bad ki khynnah skul.
