Shillong, Nailar, 16: U khlur ak phlim bapawnam jong ka Bollywood u John Abraham ha ka sngi Balang u la wan iuhkjat ha madan ialehkai jong ka Sports Authority of India (SAI), ha NEHU, Shillong ban iakynduh kyrpang ia ki khynnah ialehkai sports kiba la shah jied ha ka Super Elite Pathway Programme ba la pyniaid da ka Meghalaya State Olympic Association naduh ki bnai baladep.
Ha kane ka sngi, la donlang ruh u Ian Campbell na ka ri Australia, kynthup ruh u President jong ka Meghalaya State Olympic Association (MSOA) u Bah John F. Kharshiiing bad kiwei kiwei. Ha ka jingiakren bad kine ki khynnah, u John Abraham u la iaroh ia ka sap ka phong kaba ki don bad ia ka Meghalaya State Olympic Association (MSOA) kaba la trei shitom da ki bun bun bnai ban wad ia ki khynnah kiba don ia ki sap ialehkai sports na kylleng ka jylla Meghalaya da ka jingai jingkyrshan jong ka Sorkar Jylla.
