Shillong, K’Lyngkot, 09: Lai ngut ki rangbah ha ka sngi Baar ki la pyniasoh ialade bad ka Bharatiya Janata Party (BJP) ha ka jingialang kaba la long ha ophis treikam jong ka BJP ha nongbah Shillong.
Kine ki lai ngut ki rangbah kiba la pyniasoh kum ki dkhot ka BJP ki kynthup ia u Dr Wansainbor A Lyngwi na Sohra, u Bah Meialam Kharmalki na Upper Shillong Sawmer bad u Bah Elnathan Ryntathiang na Umlyngka.
Ia kine ki rangbah la pdiang sngewbha sha ka party da u Bah Alexander L. Hek uba long ruh u Myntri jong ka Sorkar Jylla ryngkat ka jingsakhi lang jong u State General Secretary Bah Evarist Myrsing, u State Vice President Bah Khraw Basaiawmoit bad kiwei kiwei ki nongkitkam jong ka party.
U Dr Wansaiñbor A Lyngwi u dei u nongialam barim ka KSU mynba u dang pule ha kolej bad u la pyniasoh ialade bad ka seng Congress bad shimti ruh kum u General Secretary jong ka Meghalaya Pradesh Youth Congress (MPYC).
“Ka daw kaba la pynlong ia u ban pyniasoh bad ka BJP ka long namarba u ieid ia la ka jong ka jylla naduh ka por ba u dang don hapoh ka KSU bad mynta u don ka jingsngewskhem lada ka BJP ka bat ia u lakam synshar ha ka jylla ki kam pynroi kin nang wan sha ka jylla,” ong u kyrwoh ba la phah da u Spokesperson jong ka BJP Meghalaya State Unit, Bah M. Kharkrang.
