Shillong, K’lyngkot, 29: U MLA ka Voice of the People Party (VPP) na Mawryngkneng Constituency u Bah Heavingstone Kharpran ha ka Lah Sngi u Blei, u la hiar hi dalade sha ka shnong Mawlong ban leit jurip ia ka jinglong jingman jong ka shnong bad ia ki surok namarba kan sa don ka jingiaseng Presbytery jong ka Balang Presbyterian ha kane ka shnong.
Kane ka jingiaseng Presbytery kan sdang ha ka 16 tarik haduh ka 18 tarik, Rymphang, 2024.
Kane ka jingleit jurip jong u MLA ka Mawryngkneng ia ki jingpyntrei ia ki surok ban leit sha jaka long jingiaseng la shem ba ka jingpyntrei ia ka surok ka la iaid shaid shaid bad na ka Liang jong u MLA u la kyrpad ba kin pyndep shwa ban long ka jingiaseng.
Ha kane ka jingjurip la synran lang da ki Engineer ka PWD bad ki dkhot ka VPP, u Rangbah Shnong, ki Tymmen Basan bad ki Rangbah Balang.
Ha ka jingiakren bad u Bah Kharpran, u la ong ruh ba ka jingslem ban sdang kham mynshwa ka dei na ka daw ba ka slem ka mang tyngka.
U Bah Kharpran u la ai khublei ia ki Engineer ka tnat PWD bad kumjuh ia u Symbud Myntri Rangbah ka Jylla u Bah Prestone Tynsong uba peit ruh ia ka tnat PWD halor ka jinglong jong u ban mang pisa na ka bynta ban shna ia kane ka surok.
