Kenneth Nongsiej
Ka ri India ka dei ka long ka saw kaba don ka lynti rel kaba heh tam ha ka pyrthei. Ka rel kit briew kaba nyngkong eh jong ka ri ka la ïaid ha ka 16 tarik u Risaw, 1853, hapdeng ka Thane bad ka Bori Bunder ha Bombay (Mumbai). Na ka bynta ka jylla Meghalaya, ka lynti rel ka la long ka phang kaba la ïatai la bun bun snem bad ka Khasi Students’ Union ka seng ka donbor bha ka dei ka nongshim bynta kaba khraw ha ka jingpyrshah jong ka. Ka lynti rel Mendipathar kaba sdang treikam naduh ka 30tarik Nohprah, 2014, ka pynïasoh ïa ka Garo Hills sha kiwei pat ki bynta jong ka Ri, ïa ka mat ban pynïar ïa ki lynti rel sha kiwei pat ki bynta jong ka jylla khamtam sha Khasi bad Jaiñtia Hills la ïakynduh da ka jingpyrshah.
Ha ka mynnor ki lynti rel ki la don ka bynta kaba kongsan ha kaba pynïasoh ïa ka ri lum Khasi bad ka ri thor. Ïa ka Cherra Companyganj State Railways (CCSR) la seng kum ka lynti ïaid rel hapdeng ka Bengal (bym pat phiah) bad ka Ri Khasi ha ka por jong ka jingsynshar phareng. Ka CCSR ka la sdang ban treikam ha ka 6 tarik u Ïaiong, 1886, da kaba ai ïa ka jingpynïasoh kaba la ai jingmyntoi ïa ki nongshong shnong bad ïa ki nong Bilat. Hynrei ka jingtreikam jong ki lynti rel ha kane ka bynta jong ka ri ka la sangeh la slem bha bad ki jingpyrshang ban pynim biang ïa ki lynti rel ha ki thaiñ Khasi Hills bad Jaiñtia Hills ki la ïakynduh ïa ka jingpyrshah kaba jur khamtam eh namar ka jingtieng ïa ka jingwan tuid jong ki briew kiba nabar.
Ka iktiar ban weng ïa ki jingeh jong ka jingwan buhai shnong : Ha ka 18 tarik u Lber, 2024, ka sorkar Meghalaya ka la pynbna ïa ka jingthmu jong ka ban pyntreikam ïa ka aiñ ïada ïa ki nongshong shnong ka Jylla (MRSSA), 2016, ha ka rukom kaba kham don jingmut ban pynbiang ïa ka Revolving Fund kaba 2 lak tyngka na ka bynta kawei kawei ka District. Ïa kane ka aiñ lah ban niew kum ka aiñ kaba la paka bha bad ba ka la ruh ban long ka polisi kaba lah ban long ka nuksa na ka bynta kiwei pat ki jylla kiba ïakynduh ïa kijuh ki jingeh namar ba ka thmu ban weng ïa ka jingeh kaba la slem bha jong ka jingwan tuid ki briew ki bym dei ki ki trai ri trai muluk kaba la shim ba ka long ka jingma ïa ka kolshor, ka imlang sahlang bad ka jingbun briew jong ki trai ri trai muluk jong ka jylla.
Ha ka tynrai jong ka, ka MRSSA ka wad ban khanglad ïa ki kynhun pyrshah imlang sahlang ban ïoh jaka rieh jaka dem ha ka jylla da kaba thaw ïa ka rukom treikam na ka bynta ka jingpynrung kyrteng ïa ki nongshong ha ki Dorbar shnong. Ka aiñ ka la pynbeit ryntih ïa ka bor jong ki khlieh tynrai ha kaba pynïaid ïa ka jingwan tuid jong ki briew ha ka jaka ba ki khmih bad ban pynthikna ïa ka jingshngaiñ bad jingbit jingbiang jong ki nongshong shnong. Kat kum ki jingthoh, ka dei ka Aiñ kaba bha kaba lah ban weng ïa ki jingeh kiba ïadei bad ka jingwan tuid ki briew nabar bad ka lah ruh ban long ban plie lad ban pynïasoh rel.
Shuh shuh, ki lum Garo ki la ïoh jingmyntoi na ka lynti rel Mendipathar, bad ki lum Khasi bad Jaiñtia ki dang sah khlem rel. Ka daw ba kongsan jong kane ka long ka jingtieng ïa ka jingwan tuid ki briew khlem da tehlakam bad khlem da pynbeit ryntih kaba lah ban pynkylla ïa ka jinglong jingman jong ki briew ha kine ki thaiñ. Ki nongshim bynta kiba donbor ki kynthoh ba ka jingpynïasoh ïa ka lynti rel ka lah ban wanrah ïa ka jingwan buhai shnong paidbah na kiwei pat ki bynta jong ka ri India sha kane ka jylla da kaba buh jingma ïa ki kolshor bad ki jaitbynriew trai ri trai muluk.
Kane ka jingtieng ka long ka jingsngewkhia kaba shisha. Ha ki katto katne ki jylla jong ka thaiñ shatei lammihngi, kynthup ïa ka jylla Meghalaya, ka jingwan tuid jong ki briew kiba nabar ka la long ka mat kaba la wanrah ïa ka jingeh ha ka ïoh ka kot, ka kolshor, bad ka imlang sahlang. Ki trai ri trai muluk kiba ju sngew ba ki shah pynbor suki suki ha ki nongshong shnong nabar ka thaiñ kaba ïalam sha ka jingïakhun na ka bynta ki marpoh khyndew, ki kam, bad wat ka jingsynshar ha ka saiñ pyrthei. Ha Meghalaya, ki riewlum Khasi, Jaiñtia, bad Garo ki long kiba bun na ki nongshong shnong, hynrei ka jingbun jong ki ka lah ban tlot lada ym pynbeit bha ïa ka jingwan buhai shnong.
Ka jingtieng ïa ka jingwan tuid ki bar jylla: Ka jingpyrshah ïa ka jingpynïasoh ïa ka lynti rel ha ka bri u Hynñiewtrep ka dei ka jingsngewkhia halor ka jingktah ïa ki jingwan tuid ki barjylla. Ka don ka jingtieng ba ka jingplie ïa ki lynti rel kan wanrah ïa ka jingkiew ka jingwan buhai shnong khamtam eh jong ki briew na kiwei ki bynta jong ka ri India bad Bangladesh kaba lah ban pynkylla ïa ka kolshor bad ka imlang sahlang jong ka Jaitbynriew. Hato ki rel ki lah ban long ka lad kit ïa ki nongwan buhai shnong? Ïa kane ka jingkylli lah ban jubab shi bynta da ka khubor ba la pynmih da ka ANI News ha ka 1 tarik Nailar 2024 kaba la pynpaw ba ki bor pahara ki la kem ïa 10 ngut ki briew shimet na steshon rel Agartala kynthup ïa 8 ngut ki nong Bangladesh namar ka jingsuba ba ki khaii briew bad ka khubor ba la pynmih da ka NDTV ha ka 13 tarik u Nailar 2021, ka la pynpaw ba 10 ngut ki briew, kiba la suba ba ki dei ki poiwir Rohingya kiba wan rung be-aiñ la kem na kawei ka rel Rajdhani Express kaba don ha station New Jalpaiguri ha West Bengal bad la kynnoh ba ki la ïaid lait ha ka 10 tarik Jymmang na Comilla ha Bangladesh sha Sonamura ha Tripura bad ki la kiew rel ha Agartala. Kane ka pyni ba ki rel ka long kawei na ka lad ka lynti ban tuid ki mynder ri. Ka jaitbynriew ka la ïaleh la slem ban pynneh pynsah ïa ki riti dustur. Ka Jaitbynriew ka sngewkhia ïa kino kino ki jingjia kiba lah ban ktah ïa ka jinglong tynrai jong ha la ka bri.
Ka jingdonkam ban leh ïa ka Pilot Study ïa ka MRSSA ha Steshon Rel Mendipathar:Kawei ka lad ban weng ïa ki jingeh kiba ïadei bad ka jingpynheh ïa ka lynti rel ha ri lum Khasi bad Jaiñtia ka long ban pynlong ïa ka jingpule bniah ïa ka MRSSA ha ki jaka ba la don lypa ka jingpynïasoh rel, ka steshon rel Mendipathar ha ri lum Garo ka ai ka jaka kaba biang bha na ka bynta kum kane ka jingpule da kaba peit bniah ïa ka kumno la pyntreikam ïa ka MRSSA ha kane ka jaka ka sorkar ka lah ban lum ïa ki jingtip kiba kordor halor ka jingtreikam jong ka ban tehlakam ïa ka jingwan tuid jong ki briew kiba nabar.
Ka jingpule bniah kan kynthup ïa ka jingpeit bniah ïa ka jingwan ki briew sha ka thaiñ lyngba ka steshon rel bad ban bishar bniah la ki kyndon jong ka MRSSA ki biang ne em ban ïada ïa ka jingwan tuid ki briew. Kan kynthup ruh ïa ka jinglum jingmut na ki nongshong shnong ban sngewthuh ïa ki jingeh jong ki bad hato ki sngew ba ka Aiñ ka treikam kumba la thmu. Nangta lah ban pyndonkam ïa kane ka jingtip ban shim ïa ki rai bad ki polisi kiba pynshong nongrim ha ki sakhi ban pynïar ïa ka jingpynïasoh rel sha kiwei pat ki bynta jong ka jylla lane ba ym pat donakm ban pynïasoh rel.
Lada ki jingmih na ka jingpule bniah ki long kiba bha, ka sorkar kan don ka mukotduma kaba khlaiñ ban pyni sha ki nongshim bynta kiba pyrshah ïa ka jingpynheh ïa ka lynti rel. Ka lah ban pyni ba ka don ka lad treikam ban ïada na ka jingwan tuid jong ki briew kiba nabar bad ba ka la ban ïada ïa la jinglong trai ri trai muluk. Kum kane ka jingpynwandur ïa ki polisi kiba pynshong nongrim ha ki sakhi ka lah ban ïarap ban tei ïa ka jingshaniah hapdeng ka sorkar bad ki nongshong shnong kaba plie lad ban pynïar ïa ki lynti rel ha ka jylla.
Ha ka juk ba mynta, ym lah ban len ïa ka jingdonkam ban pynbha ïa ka jingpynïasoh. Ki lynti rel ki don ka lad ban wanrah ïa ka jingmyntoi kaba khraw ha ka ïoh ka kot ha ka jylla da kaba pynsuk ïa ka kam jngohkai pyrthei, ka leit ka wan ki briew bad ban pynsuk ban ki ïa ki mar ki mata. Ka jingkiew dor jong ki umphniang (petrol bad diesel) ka ktah ïa ka jingkiew dor jong ki jhur, u khaw bad kiwei kiwei ki mar ba mar dih. Kumta, ngi donkam ban pyrkhat biang ïa ka jingpynïasoh rel, khamtam eh na ka bynta ki rel kit mar, hadien ba la shim ïa ki lad jingïada ban ïada ïa ka Jaitbynriew. Khlem kano kano ka policy ban ïada ïa ka jylla na ki jingwan rung ki barjylla, kan long kaba eh ban ïaid shakhmat.
Kumba ka long mynta ha kaba ym don lynti rel kaba lah ban pynïasoh ïa ka nongbah jong ka jylla ka jingwan ki kali na Assam sha kane ka jylla ka long kaba jur bha, bad kane ka ai jingmyntoi ïa ki nongpynïaid kali jngohkai pyrthei jong ka Assam ban ïa ka Meghalaya. Balei kane ka jia? Ka daw tynrai jong kane ka jingeh ka long ba ym don lynti rel ha ki thaiñ Khasi bad Jaiñtia Hills kiba lah ban pynïasoh ïa kiwei pat ki bynta jong ka ri bad lada ki nongjngohkai pyrthei na ki longïing kiba pdeng ki kwah ban wan sha Meghalaya ki hap ban kiew rel ban poi sha Guwahati, Assam, bad nangta ki dei ban shim da ki kali Tourist ban poi sha Meghalaya. Shuh shuh, ïa kane ka thaiñ la pynïasoh da ki liengsuin sha Delhi, Kolkata, bad kiwei kiwei, hynrei kam pat biang ban pynmih bun ki nongjngohkai pyrthei sha kane ka jylla namar ba ki liengsuin ha ka jylla kim biang bad ki hap ban shaniah ha ka Assam. Lada pynïasoh ïa ka lynti rel sha kane ka thaiñ ka jingwan ki kali jngohkai pyrthei na Assam kan duna bad kane kan weng ïa ki jingeh jong ki nongniah kali jngohkai pyrthei trai ri jong ka jylla.
Hynrei kano kano ka jingpynroi ka dei ban ïahap bad ka jingdonkam ban pynneh pynsah ïa ka jinglong kyrpang jong ka kolshor jong ki jaitbynriew trai ri trai muluk jong ka jylla. Ka jingeh ïa ka sorkar ka long ban wad ïa ka lynti pdeng hapdeng ka roi ka par bad ka jingpynneh pynsah ïa ki riti dustur bad ki jinglong tynrai jong ka thaiñ. Dei hangne ba ka MRSSA ka lah ban don ka bynta kaba kongsan. Lada pyntreikam hok ïa ka aiñ ka lah ban ai ka lynti ban pynbeit ïa ka jingwan ki briew nabar da kaba weng ïa ki jingeh jong ki nongshong shnong katba ka ailad ban pynïar ïa ki lynti rel.
