Shillong, Jylliew, 21: Ka Regional Committee na ka bynta ka Ribhoi District kan sa shong ia ka jingialang banyngkong eh ha ka 23 tarik mynta u bnai ban iathir iatai ia ka jingpynbeit ia u pud u sam ha ka wat kaba ar na ka bynta ki shnong kiba hap hapoh ka thaiñ Block-II kiba don hapdeng ka jingiakajia pud bad ka Jylla Assam.
Ia kane la iathuh da u MLA/MDC jong ka Mawhati Constituency u Bah Charles Marngar ha ka jingiakren bad ki lad pathai khubor ha ka sngi Balang.
U Bah Charles Marngar uba long ruh u dkhot jong ka Regional Committee na ka bynta ka Ribhoi District ba la khlieh da u Symbud Myntri Rangbah ka Jylla u Bah Prestone Tynsong, u la ong, “ha ka jingshisha ka jingialang jong ka Regional Committee ka dei ban long ha ka 16 tarik, hynrei na ka liang jong u Chairman ka Committee u Bah Prestone Tyngsong u la pyntip ba la pynkynriah noh ia kane ka jingialang sha ka 23 tarik mynta u bnai na ki daw ki bym lah ban kiar.”
“Kum uwei na ki dkhot jong ka Regional Committee, nga la kren da kaba shai ba lada long kumno kumno ruh ngan don beit bad u paidbah. Ka sur jong u paidbah kan dei ka sur ka jong nga kaba ngan rah hapoh ka Regional Committee,” la ong u Bah Marngar. “Kumba ngi la ieng naduh kaba sdang ba ngin ym ailad ba ngin duh ia ka khyndew ka shyiap, kata ka dei ka nongrim. Ka nongrim jong ka synjuk ki rangbah shnong kaba ngi iatreilang ha khappud, kata ka dei ka nongrim jong nga bad ngan ym lah ban kylla na kata,” u la iai ban.
