Shillong, Nailur 18: Ka Singer and Dancer’s Association hapoh ka jingialam jong u samla Gabriel T Mawlong kum u President ka la pynkut noh ia ka Grand Finale jong ka Singing and Dancing Superstar-Season 1 kaba la long ha ka sngi saitjain jong ka taiew baladep ha Mission Compound, Shillong.
Ki nongbishar ha ka jingiakop rwai ki long u khlur rwai jong ka Bollywood u Amit Paul uba long ruh u kaitor ba pawnam jong kane ka jylla Meghalaya bad u samla Wanjop Sohkhlet. Katba ki nongbishar ha ka jingiakop shad ki long u Samla Micky Paul Mawlong bad u Samla Phrangsngi Lyngdoh Mawphlang.
Ha kane ka sngi u Amit Paul bad u samla Gabriel Mawlong ki la pyniap biej ia ki nongiashim bynta ha kane ka jingiakob da ki sur jingrwai na ki ryndang ba syiang ki jong ki.
Ha ka jingpynbna ia ka result jong ka jingiakob rwai, ia ka nam lahduh la ioh rah da ka samla Clarincy Mary Lwai kaba la ioh khur ia ka song pisa kaba 50 hajar tyngka ryngkat bad ka syrnot, katba u samla Sunny bad u samla Ford Sohtun ki la iohrah ia ka kyrdan kaba ar ryngkat bad ka song pisa kaba 30 hajar tyngka lem bad ka syrnod bad ia ka kyrdan kaba lai la iohrah da u samla Fardy. C Nengnong uba la ioh pdiang ia ka song pisa kaba 25 hajar tyngka bad ki syrnot.
Haba phai pat sha ka jingiakob shad, ia ka nam lahduh la ioh rah da ka kynhun ka Wansai Fusion kaba la ioh khur ia ka song pisa kaba 50 hajar tyngka, katba i heprit Insanylla Suting i la iohrah ia ka kyrdan kaba ar ioh khur ia ka song pisa kaba 30 hajar bad i heprit Haphilakmen Lyngdoh iba la iohrah ia ka kyrdan kaba lai i la ioh khur ia ka song pisa kaba 25 hajar tyngka.
La sakhi lang ha kane ka sngi, da u MDC jong ka Sohra Constituency u Bah Titostarwell Chyne uba la long kum u kongsan, u MLA jong ka Mawsynram u Bah Olan Sing Suiñ, bad kiwei kiwei kiba la shah khot sngewbha.
Ka Association ha kane ka sngi, ka la pynlong ruh ia ka jingpynkhalai nusi ha kaba ia ka First Prize la ioh da u serial No 11746, baar da u Serial No 57406 bad balai da u Serial No 131233.
Ki nongpyniaid ki la pyntip ruh ba nongjop ia ka lucky draw ki la ban wan shim ia ki khusnam hapoh 30 sngi da kaba shu telephone ha u number 9366497955.
