Shillong, Jylliew, 16: Ki Pulit ka kynhun Anti Narcotic Task Force ka East Khasi Hills District ryngkat ka jingiatreilang bad ki Pulit jong ka Rynjah bad Laitumkhrah Police Station kiba la ioh ia ka jingtip kaba bniah na ki tnat syntiat ha ka janmiet jong ka sngi palei ki la ioh kem ia ki ar ngut ki snar khaii drok kiba la tip kyrteng kum u Eldikinstar Sohtun bad u T. James Seiminthang na ka shnong Nongshiliang kaba hap hapoh ka Rynjah Police Station, Shillong.
Na ka met jong ki, ki Pulit ki la ioh kurup 40 song ki synduk thep sabon ba la thep ia u drok heroin uba khia 423.09 gram, ar tylli ki mobile phone, kawei ka motor bike kaba don ia u nombar ML 05 R-5271, kawei ka PAN Card bad kawei ka EPIC.
Katkum u kyrwoh ba la phah da u Superintendent of Police ka East Khasi Hills District u Bah S. Nongtnger, la pyntip ba ki Pulit ki la register case ha Rynjah Police Station bad pynngat hapoh ka Section 21(b)/21(c)/25/29 NDPS Act bad ka jingtohkit ka dang iaid shakhmat.
U SP u la iathuh ba ha ka jingtohkit halor kane ka jingioh kurup ia u drok, ki Pulit ki la bteng ban pynlong ia ka jingkhynra ha ka step jong ka sngi thohdieng da ka jingialam jong u Eldikinstar Sohtun sha iing sah jong u kaba don ha Mawpat, ki Pulit ki la ioh kurup kawei ka suloi shna hi (Country Made Revolver), 7 tylli ki kuli 0.22 bym pat pynbthei, 6 tylli ki kuli .38 bym pat pynbthei, uwei u kuli ba la pynbthei, san tylli ki kuli jong ka suloi 12 bore, kawei ka mobile phone, ka pisa T.2 lak, kawei ka suloi Air Gun, ar tylli ki kali Mahindra Thar, kawei ka kali Maruti Zen, kawei ka kali Maruti 800 bad kawei ka kali Chevrolet Beat.
