Khliehriat, Nailur 19 : Ki nongialam shnong bad ki dkhot jong ka Khasi Students Union East Jaintia Hills District Unit ki la pynpaw ka jingpyrshah ia ka jingkyrpad jong ka National Highway Authority of India ban shah plie noh ia ka khyrdop khrong khajna lane ka Toll Gate kaba don ha Lumshnong, East Jaiñtia Hills District ia kaba la khang tala da ka Khasi Students Union, East Jaiñtia Hills District Unit katba ym pat shna pynbha ia ka surokbah National Highway-6.
Ha ka jingialang ba la pyniaid da u Additional Deputy Commisioner jong ka East Jaintia Hills u Bah G. Warjri, ki nongmihkmat jong ka National Highway Authority of India kim shym la wan mih satia sha kane ka jingialang.
Ka seng ka ïeng skhem ha ka nongrim, katba ka jingpynbha surok kam pat dep, ka National Highway Authority of India kam pat lah ban plie satia ia kane ka khyrdop khrong khajna. Na ka liang u Adll. Deputy Commisisoner u la pynpaw ba un sa phah ia ka rai ba la shim ha kane ka jingialang sha ka National Highway Authority of India bad sha ka Sorkar.
