Shillong, Jylliew, 29: Ki nongialam ka Khasi Students’ Union (KSU) Laban Circle ha ka sngi Palei ki la leit ban iakynduh ia ki bor pyniaid jong ka Longkmie Gas Agency kaba don ia ka shlem treikam ha Laban Last stop, Shillong hadien ba ka seng ka la ioh shibun ki jingujor na ki paidbah ka thaiñ Laban halor ka jingioh duna ki tyndong lyer shet jingshet ne LPG Cylinder ha ka shi snem.
Hapoh ka jingialam jong President u Samla Reuben Najiar bad u General Secretary u Samla Jason Laloo ka seng ka la pynsngew sha ki bor pyniaid jong ka Longkmie Gas Agency ia ki jingujor ba la ioh na ki paidbah jong ka thaiñ Laban ha kaba iadei bad ka jingioh duna ia ki tyndong lyer shet ha ka shi snem, kata, tang 10 tylli ha ka shi snem.
Na ka liang jong ka seng ka la wad jingtip bad ka la lap ba ki Gas Agency ki dei ban pynbiang ym duna 12 tylli ki tyndong lyer shet ha ka shi snem.
Ka seng kaba la pynlong ia ka jingleit khynra ha ka 13 tarik u Jymmang, 2023 ia ki dukan die sha bad ja ban peit ia ka khuid ka suba, la lap ba ki dukan ki ju pyndonkam ban shet da ki tyndong lyer Domestic LPG Cylinder kaba long pyrshah katkum ka aiñ.
Halor kane, ka seng ka la pan jingpynshai na ki bor pyniaid jong ka Longkmie Gas Agency kaba la pynsngew ruh ia ki jingeh ba ki shem bad kular ruh ban pynbit pynbiang ia ki jingduna kaba ki paidbah ki mad bad ha kajuh ka por ki la pynshai ba kam don kano kano ka jingdie tuh ia ki tyndong lyer jingshet.
Ka Seng ka la maham tyngeh ia ka Longkmie Gas Agency ba kam dei ban pynduna ia ki tyndong lyer shet jingshet ban pynpoi sha ki longïing jong ki paidbah nongshong shnong ka thaiñ Laban.
