Shillong, Jylliew, 09: Ka Kong Rilinda Khmah ka kurim jong u Bah Roning Nongkynrih uba la duhei ia la ka jingim ha ka jingshah siat iap ha ki shipai Border Security Force (BSF) ha ka miet 6 tarik Jymmang, 2023 ha ka shnong Mawshun, Pynursla Sub-Division, kam pat ioh jingiarap eiei ruh em na ka tnat shipai BSF watla ka Sorkar Jylla ka la pyntip dang shen ba kan sa iakren bad ka tnat shipai BSF ban siew ia ka bailutksan.
Ki nongialam jong ka National Hynniewtrep People Federation (NHPF) kiba dap da ka jingsngewkhia halor kane ka jingjia ha ka sngi Palei ki la leit ban iakynduh ia ka kurim jong u Bah Roning Nongkynrih, ka Kong Rilinda Khmah kaba la iathuh ba haduh mynta ka Sorkar Jylla kam pat ai jingiarap eiei bad iathuh shem lanot ruh ia ka jingiakynduh jingeh ban pyndap pynbiang ia la ka ing ka sem naduh ba u kurim jong ka, u Bah Roning Nongkynrih u la khladnoh na kane ka sla pyrthei.
U General Secretary ka NHPF u Bah Youbarlin Lyngdoh Sangriang u la dawa ia ka Sorkar Jylla ba ka dei ban iarap ia ka longing jong ka Kong Rilinda Khmah da kaba aikam hynrei ym da kaba shu siew bailutksan da ka pisa khnang ba kan dup lah ban bsa, ban pynheh pynsan bad ban pynnang pynstad ia ki arngut ki khun kiba dang rit kiba la duhnoh ia la u jong u Kpa.
U la phah ia ka kyrpad sha ki paradoh parasnam kiba don ia ka mynsiem sngewlem ban noh jingiarap katba lah ei ia ka ïing ka sem jong ka kong Rilinda Khmah kaba sah ha ka shnong Nongkynrih, Raid Nongkynrih.
Kum ban shu pynkynmaw hangne, Ki shipai Border Security Force (BSF) ki la kem ia lai ngut ki shipai kiba donkti ban synreit kuli ia ka trok kaba lam sha ka jingiap jong u Bah Roning Nongkynrih ha Mawshun.
Kine ki lai ngut ki BSF ki dei kiba la tip kyrteng kum u head constable Moni Singh, u Constable Sengel Singh bad u Constable Kdam Kishore. Kine ki lai ngut ki dei kiba don ha ka sngi kaba jia ka jingther kuli. Ha kajuh ka por, ka tnat shipai BSF ka la sospon ia u Moni Singh uba siat haduh 3 kuli na ka suloi SMG Barreta bad lah phah ia u sha BSF Headquarter ryngkat ka hukum ba um dei ban mih khlem da ioh jingbit.
