Shillong, Jylliew, 09: Ka Khasi Jaintia Fish Wholesaler and Retailer Association (KJFWRA) ha ka sngi Thohdieng ka la leit ban iakynduh ia ka Commissioner of Food Safety ka Kong R.M Kurbah ban pan jingpynshai halor ka jingphah leh Test ban pynshisha ba ki dohkha ba la wanrah na shabar ka jylla ki dei kiba la injek da ka dawai Formalin.
Ha ka jingiakren bad ka Batesi Tv hadien ka jingiakynduh ia ka Kong R.M Kurbah, u Bah C. Wankhar uba long u nongialam jong ka KJFWRA u la iathuh ba ka Commissioner of Food Safety ka la bthah ba dei ban da leh test shwa ia ki dohkha kiba la wanrah nabar jong ka jylla shwa ban pynrung sha basa die dohkha ha Iewduh kum ka jingpynthikna ba kine ki dohkha kim dei satia kiba la khleh da ka dawai injek Formalin.
U Bah Wankhar ula iathuh ba ha ka jingiakren bad ka Kong Kurbah, la shah ban wanrah tang ia ki dohkha na ka jylla Assam namarba tang na kane ka jylla Meghalaya yn ym lah satia ban pyndap ia ka jingdonkam jong u paidbah.
“Ki la kular ia ngi, ba manla ka 15 sngi ba la wanrah ki dohkha na ka Jylla Andhra Pradesh, yn hap ban leh test da ka Food Safety. Ngi ruh ngi la rah ia ka syrnot kaba la phah na Andhra Pradesh kaba pynshisha ba ki dohkha kim dei kiba la injek dawai Formalin,” u la ong.
U la iathuh lada jia ba ka Food Safety ka lap ba ki dohkha kiba wanrah na Andhra Pradesh kiba la injek dawai Formalin ka shong ha kane ka tnat ban pynshitom watla ha ka syrnot ba la phah na ka jylla Ahdra Pradesh la pynshisha ba kam don ka jinginjek dawai Formalin.
“Ngi kloi ban iatreilang bad u paidbah, ngi kloi ban iatreilang bad ka Sorkar na ka bynta ka jingkoit jingkhiah jong u paidbah. Nangne shakhmat ngi la pynpaw hakhmat ka DC lada ki lap eiei ia ki dohkha ba la leh test ngi kloi wat ban pynphai noh ia ki dohkha,” u la bynrap.
Shuh shuh u la iathuh ba ka Commisioner of Food Safety ka la ailad ia ki nongdie dohkha ban die tang ia ki dohkha kiba wan na ka jylla Assam.
Haba kylli, u la iathuh ba ka Association kan shong shwa da ka jingialang shwa ban shim ia ka rai halor ka jingai jingbit jong ka Commissioner of Food Safety ban die tang ia ki dohkha kiba wanrah na ka jylla Assam.
