Shillong, Naitung, 10: Lai ngut ki mynder ri na ka ri Bangladesh kiba rung tuh shapoh u pud u sam jong ka ri India ha ka shnong Tishang Nongjri, Pynursla Civil Sub-division, East Khasi Hills District ki la shah kem ha ki paidbah jong ka shnong Tishang Nongjri, katba ki dang pom tuh ia ki dieng na ka khlaw shnong ban pynkie lyngba ka wah sha ka ri Bangladesh.
Ha u kyrwoh ba ka Ri War Development Organisation (RWDO) ka la phah sha ki lad pathai khubor, u President u Bah Tensing Khonglah, la iathuh ba ki mynder ri na ka ri Bangladesh ki ju rung tuh shapoh ka shnong Tishang Nongjri lyngba kawei ka thliew muri kaba heh bad nangne ki ju rung sha khlaw ban pom tuh ki dieng ki siej, ia ki dieng kwai, bad kiwei kiwei ki marrep.
Ka seng ka la pyntip ruh ba kine ki mynder ri, ym tang ba ki pynjot dusmon ia ka jingthung jingtep, hynrei ki ju byrngem byrsit ruh wat ia ki trai shnong kiba trei sha ki bri ki bsa lada ki shlan ban beh thong ki. Shuh shuh ki nongshong shnong ki iathuh ruh ba kim ju nud ban leit sha bri sha bsa tang marwei lane ar ngut namarba ki sheptieng ia ki mynder ri na Bangladesh kiba ju wan rung tuh da ki kynhun ryngkat ki tiar pynmynsaw.
Ha kaba iadei bad kane, ha ka 8 tarik mynta u bnai ka seng ka la leit ban iakynduh ia ki heh shipai jong ka tnat BSF ban iakren halor kane ka jingprong tuh jong ki mynder ri sha kane ka shnong.
Ki shipai BSF ki la ai ka jingmynjur ban iatreilang bad ki nongshong shnong ryngkat lang bad ka seng na ka bynta ban wanrah ia ka shong shngaiñ ha ka thaiñ bad ban pyrkhing bha ia kane ka jingioh lad jong ki mynder ri ban wan rung tuh shapoh u pud u sam ka Ri India.
U Nongialam ka RWDO u la iathuh, katba ki dang mih na ktem sah ki shipai BSF bad iaid lyngba ka jingker sainar ban leit phai noh sha la ing, ki la lap ia ki mynder Bangladeshi ba ki thmu ban rung tuh sha u pud u sam jong ka shnong Tishang Nongjri lyngba ka thliew muri ba don jingkieng.
“Ngi la pyntip noh sha ki shipai BSF kiba don hajan kane ka jingkieng bad ynda ngi la iakren bad ki shipai BSF ki iathuh ha ngi ba ki don ki mynder Bangladeshi kiba tuh bad pom dieng sha pdeng khlaw ka bri Tishang Pungdiengïong,” u la ong.
Ki dkhot ka seng ki la rung shapdeng khlaw ki la ioh kem ia ki lai ngut ki mynder ri kiba dang pom tuh ia ki dieng kwai, ki dieng met ia kiba ki la thmu ban pynkie lyngba ki wah kiba tuid sha Bangladesh.
Hadien kane, ki shipai BSF ki la kem noh ia ki lai ngut bad kurup noh ia kine ki dieng bad lai tylli ki wait na ka kti jong ki mynderi Bangladeshi ha kaba la aiti noh sha ki Pulit ban leh ia kaba donkam.
Ka Seng ka la phah ruh ka kyrwoh sha ka Sorkar Kmie lyngba ki shipai BSF ban pyndep noh kham kloi ia ka jingker sainar shiah bad ban buh noh da ki CCTV Camera ha ki thaiñ khappud khnang ban tehlakam ia ka jingwan rung tuh jong ki mynder ri Bangladeshi sha u pud u sam ka Ri India.
