Shillong, Naitung, 10: Ka District Magistrate jong ka East Khasi Hills ha ka lah sngi U Blei ka la pynmih da ka hukum hapoh ka Section 144 CrPC da kaba bthah ia baroh ki dukan, ki dukan die jingbam, ki restaurant bad ki dukan die tiar ba ki lah ban plie tang haduh ka por 10 baje mynmiet.
“Na ka daw ka jingjia ha kylleng ka nongbah Shillong kaba lam sha ka jingthud jong ka shong suk shongsaiñ khamtam ha ka por mynmiet bad kum kine ki jingjia ki lah ban pynthud, buh jingma ia ki nongleit nongwan bad ia ki jingim briew, namarkata la donkam ban shim ia ki lad ki lynti ban iada ia ka jingim jong ki paidbah bad ban pynneh ia ka shongsuk shongsaiñ hapoh ka nongbah,” ong ka District Magistrate ka Kong R.M. Kurbah.
“Katkum ka itkiar ba la pynkup ha nga hapoh ka Section 144 CrPC la pyrkhing ban plie ia ki dukan, ki dukan die jingbam, ki Restaurant bad ki Enterprise hapoh ka nongbah Shillong tang haduh ka por 10 baje mynmiet. La mana ban dih ia ki jingdih pynbuaid bad ban leh ia ki kam be-aiñ hapoh ki kali, ban pynheh sur jingrwai hajan ki skul, ki jaka mane Blei, hajan ki Hopsital bad ha ki shnong ki thaw hadien ka 10 baje mynmiet,” ong ka hukum na ka District Magistrate.
Kino kino kiba pynkhein ia kane ka hukum kin shah pynshitom hapoh ki kyndon jong ka Section 188 jong ka Indian Penal Code.
Kane ka hukum kan treikam noh mardor naduh ka 12 tarik, Naitung, 2023 tad haduh ban da pynbna da kumwei pat.
