Shillong, Nailur 04 : Ka Khasi Students’ Union, Mawlai Circle ha u kyrwoh ba la phah da u Samla Biangbor Paliar, President, KSU Mawlai Circle sha ki lad pathai khubor la ong ba hadien ba ka seng ka lah ioh jingtip, ba ka don ka jingiakynad hapdeng ki dkhot kawei ka seng bhalang bad ki pulit hapoh ki thaiñ Khyndailad ha kaba la sakhi ia ka jingpynibor jong ki Pulit.
Ha kane ka jingpynibor ki pulit, ka la don ka jingleh palat jong ki bor pulit ha kaba ki lah thombor khlem kheiñ snep shuh ia ki kynthei briew kiba die dukan hapoh ka jaka pynieng kali jong ka MUDA ha pyrshah ka SBI ophis hajan Khyndailad, la batai ka kyrwoh.
Kane ka jingthombor ki pulit da kaba kawang ia u Bom pynsat khmat hapoh ka dukan diesha wat hapdeng ba kitei ki longkmie ki lah khang khyrdep ia ka dukan ka jong ki. Kane ka jingleh jong uwei u pulit phong jaiñ iong kaba lah ban iohi bad ba la saphriang lyngba ki kor ring dur (Video), ka dei ka jingthmu ban pynmynsaw ia kitei ki ar ngut ki kynthei briew kiba dei napoh ka shnong Mawlai Mawtawar, Umjalimut bad kane ka jingleh utei u pulit kadei ym tang ka jingleh kput lane leh rhah hynrei ka dei ka jingthmu wat ban shim ia ka jingim ka jong kitei ki kynthei briew ki bym don bynta eiei ha ka jingklumar kaba mih ha ki thaiñ Khyndailad mynne ka sngi. la ong shuh shuh ka kyrwoh
Ka Seng ka pynrem jur ia kane ka jing thombor ki pulit ki bym shym la don ka mynsiem jingisynei shuh wat ia ki kynthei briew, ka Seng ruh ka dawa ba ki bor ba halor ki dei ban pynshitom mardor ia ki pulit kiba donkti ha katei ka jingthombor.
Shuh shuh ka seng ka ikyndit ia ka jingleh khlaiñ bor ki pulit ia la ki doh ki snam hapoh sor Shillong, hynrei katba ki pynrit bad pyndem tdong pat ha ki thaiñ khappud, pynkut ka kyrwoh na ka Seng.
