Tura, K’lyngkot 18 : Ka jingialehkai jong ka athletics ha ka lympung ialehkai jong ka Meghalaya Games kaba San ka ba la long ha Tura, West Garo Hills District, ka la lap ba poi noh sha kaba kut mynta ka sngi.
Bad ha kine ki lai sngi jong ka jingiakhun u Skhemlang Suba ka Ri Bhoi bad ka Glorify Kurbah ka EKH ki la ioh ba kin rah ia ka nam kum u rang ne ka thei ialehkai ba kynsai (best athlete).
Na ka liang u Skhemlang ka daw kaba la pynlong ia u ba un ioh ban rah ia kane ka nam ialehkai ba kynsai ka lympung ka la wan hadien ba u la lah ban pyndep kham sted ia ka thong ha ka jingiakob mareh kaba 800M hadien ba u la lah ba un pyndep ia ka thong ha ka 1:54.7 sec, kaba la biang pura ia u ba un ioh ban khur 897 poin, katba na ka liang ka Glorify Kurbah, ka la ioh ba kan khur ia kane ka nam hadien ba ka la lah ba kan pyndep ia ka thong ka iakob mareh kaba 800m da ba kaba ka la lah ba kan pyndep ia ka thong ha ka 2:21.5 sec bad khur 809 poin.
Haba khein kyllum pat ia ka rukom ialehkai ha baroh ki lai sngi jong kane ka jingialehkai, ka kynhun jong ka West Jaintia Hills District kaba la ioh ba kan khur 17 tylli ki takma ba kynthup 8 tylli ki takma ksiar, 4 ki takma rupa bad 5 ki takma rnong, ka kynhun kaba wan ba-ar dei ka Ri-Bhoi District hadien ba ka la ioh ba kan khur 15 tylli ki takma ba kynthup 6 ki takma ksiar, 6 ki takma rupa bad 3 tylli ki takma rnong, katba ka kynhun ialehkai jong ka East Khasi ka la wan ban bat ia ka kyrdan kaba lai hadien ba ka la ioh ba kan khur 10 tylli ki takma ba kynthup 5 ki takma ksiar, 3 ki takma rupa bad 2 tylli ki takma rnong.”
