Shillong, Rymphang, 26: Watla ka University of Science and Technology, Meghalaya ka don hapoh u pud u sam jong ka Jylla Meghalaya hynrei ka long kaei kaei kaba sngewlyngngoh ban tip ba kane ka skulbah kaba don ha khappud jong ka Jylla Meghalaya bunsien ka la pynmih ia ki khubor laitkam sha ki kot khubor kiba dei na ka jylla Assam hynrei ym ha ki kotkhubor kiba la pynmih na ka jylla Meghalaya.
Ki nongialam jong ka Ri Bhoi People Council ba la lamkhmat da u President u Bah Jayson Lennox Nongrum bad ka Meghalaya People’s Social Organisation ba la lamkhmat da ka President ka Kong M. Wanniang hadien ki la ioh ujor na kiba bun ki khun samla, ha ka Lah Sngi U Blei ki la leit ban iakynduh ia u Chancellor jong ka University of Science and Technology, Meghalaya u M. Hoque ban iakren sani halor kane ka kam.
Ha ka jingiakren, ki nongialam jong kine ki ar tylli ki kynhun ki la kyntu ia u Chancellor ba ka USTM kan ym pynlong ia ki interview kam ha ki sngi u Blei da kaba pyrkhat lem ia ki nongshong shnong ka jylla Meghalaya khambun kiba dei ki Khristan bad ban kiar katba lah ban pyndonkam ia ki Gamosha na ka Jylla Assam haba don kino kino ki prokram hapoh kane ka skulbah hynrei ban pyndonkam beit da ki jain Ryndia ba la pynmih na kane ka jylla Meghalaya.
