Bah S. Lyngdoh bad Bah B. Nongrum
Kumba long mynta ka jylla Meghalaya ka don hapdeng ka jinghiar arsut ha ka pule puthi kata katkum ki jingaiseng jingkheiñ da ka bor sorkar India. Hynrei hapdeng kane ka jinghiar arsut kaba la wanrah ïa ka jingjah burom ïa ka jylla, pynban ki nonghikai bad ka sorkar ki ïaleh khun jakai ïa ka lawei ki khynnah pule. Balei la ong kumta, namar ka sorkar lyngba kane ka snem kaba ladep, ka la pynmih ïa ka hukum ba katkum ka RTE, ki nonghikai bym pat dep Class-12 nangta D.El.Ed/B.Ed bad MTET/CTET kin kut ka jinghikai haduh April 2027. Ka la don ka jingdawa jong ki nonghikai ban pynneh beit ïa ki.
Haoid, shisien pyrkhat sngew synei ïa ki nonghikai kiba la hikai da ki snem bad ba kin duh noh ïa ka kam. Hynrei haba pyrkhat pat ïa ka lawei ki khynnah skul, hato nalor ba la hiar ar sut lypa ka pule ka puthi, hato kane kam ktah shuh shuh lada pynneh biang. Nalor mynta ki samla kiba la pyndep ki kyndan BA, Master bad kiwei kiwei ki shong iing bad khlem kam khlem jam.
Kaba buh jingma shuh shuh ïa ka lawei ki khynnah skul, ka long ba ki nonghikai ki la dawa syndon, wat ban ïoh pyndep ïa ka MTET, nalor D.El.Ed/B.Ed ruh kim pat pyndep. Kaba kham sngewsih shuh shuh ka long, ba don ki nonghikai bym pat pyndep satia wat tang Class-12 ruh. Kiba bun mynta ki nonghikai ki pas tang Class-X, hynrei namar ka jingdawa jong ki ban ïoh thoh wat ïa ka MTET ruh, ha kaba ka sorkar namar ka jingtieng ïoh mih ki jingïakhih biang ki nonghikai, ka la shah ba kin thoh ha ka 24 tarik July 2026.
Ka Jingkylli ka long: Balei ïa ki khynnah ban ïoh pule D.El.Ed/B.Ed donkam ban pyndep Class-12 bad nalor kata dei ban ïoh 45 percent. Lada ym ïoh 45 percent wat ban thoh MTET kim lah. Yn tang katta ki nonghikai ki la dawa ruh ban dei ban PYRKHAT wat ïa ka rukom ai mark ïa kiba la hikai lypa.
Lada ka sorkar ka leh haduh katne, balei ym shu ai direct ïa ki Certificate MTET sha baroh kiba la hikai lypa, haba ki don kata ka rukom ban ïarap ïa ki ban passed.
Nga kwah ban kylli ïa ki samla bad ki paidbah hato sngewdei mo ba tang namarba ki la hikai lypa kim pyrkhat ïa ka lawei ki khynnah, tang ban biang ka pliang ja ïalade? Mutdur ha kane ka juk kat ki nonghikai tang Class-10 kin pas, mutdur ka rukom hikai kaba kumno kin ai ha kine ki sngi.
Nga ïohi ba donkam ban pyrkhat thymmai da baroh ki samla pule, khamtam kiba la pyndep ïa ka D.El.Ed /B.Ed ne wat kiba la pyndep MTET, ki bapli haduh mynta ki shong iing khlem kam khlem jam. Ban ïakhun MTET hap pyndep ïa ka D.El.Ed /B.Ed nalor ba pynlut da ki lak nalor kata nalor pyndep class-12. Hynrei kine ki nonghikai ba pas tang Class-X pat suk jem jai.
Lada ki nonghikai ki don jingkit khlieh kin jin da la leit pyndep ïa ka jingpule tang Class-12 ruh. Hynrei kim patiaw satia katba dang biang ka por. Hynrei ynda la sngewthuh ba jan duh ka kam, wow ki dawa hana ïa la ka hok. Ka hok ban ïoh tulop ka dei jong phi, hynrei kynmaw ka hok ban ïoh ïa ka jinghikai kaba biang pat ïa ki khynnah mano ban kit khlieh?
Donkam ban pyrshah halor kane ka jingshah ban ïaleh MTET ïa ki nonghikai bym pat dep Class-12. Namar kan long ryntih ïa baroh bad kyrpang ba kan long ka jingmyntoi ïa ki khynnah skul bapli.
Kyntang ïa wai, nga khot ïa ki khynnah pule ba la pyndep D.El.Ed/B.Ed bad MTET ban ieng tylli kawei, ban dawa ïa ka Sorkar ban ym ai lad ba kine ki bym pat pyndep tang Class-12 kin pas MTET hynrei shano ka lawei ki khun samla.
